jonkurteiz

Armed and dangerous

2009-08-06T14:42:00.002+01:00

Penn og Teller reyndu að færa rök fyrir því í Bullshitti gærkvöldsins að almenn og útbreidd byssueign væri besta vörnin gegn aðsteðjandi hættum. Þeir hafa oft verið meira sannfærandi. En sérstaklega voru þeir hrifnir af fælingarmætti falinna vopna. Konur gætu nú með leyfi alrikisvaldsins gargað upp að þær væru vopnaðar þegar kynferðisafbrotamenn þröngvuðu þeim inn í bás á kvennaklósettinu. Ég er ekki viss um að byssa sé endilega málið. Tvö af flottustu bardagaatriðum hasarmyndanna enda með því að hetjan gatar óþokkann með venjulegum kúlupenna. Ég geng iðulega með kúlupenna á mér og get þakkað Jason Bourne og Martin Blank að ég er vel varinn gegn árásum misyndismanna.

Svartur

2009-07-28T23:54:00.001+01:00

Sífrandi sjálfsmeðaumkun hittir fyrir tilgerðarlíkingu af verstu sort. Síðhærðir Seattlerokkarar gleyma sér í bólugröfnum gelgjuham. Óó hvað allt er vonlaust.

Úr Black með Pearl Jam:
I know someday you'll have a beautiful life, I know you'll be a star
In somebody else's sky, but why, why, why
Can't it be, can't it be mine

Nazistapíka

2009-05-20T01:04:00.000+01:00

,,Ég er með nazistapíku.” Hún leit út fyrir að geta verið launbarn Cameron Diaz og rauðhærðu stelpunnar úr The 70’s Show ef önnur þeirra hefði æxlunarfæri karlmanns eða drottinn hefði skipt sér af getnaðinum, en slíkt er ekki án fordæma ef trúa má gömlum bókum. Röddin var glettin og ófeimin. Það var sunnudagur í Sundhöllinni og Jóhanna Guðrún var nýbúin að syngja í höfn annað sætið. Kaldari pottur þeirra tveggja heitu var stappfullur af karlmönnum merkilegt nokk og í miðjum hópi samnemenda sinna úr háskólanum sagði ung kona frá hrakförum sínum. Hún hafði verið að raka sig að neðan og ætlað að skilja eftir beina hárrönd til að vera sér til prýðis. ,,Ég er bara svo léleg að teikna að hún kom öll skökk út eins og elding.” Ég gat ekki annað en vorkennt henni sem vildi bara gera sig fína. Sjálfur hef ég hellt kaffi yfir hvíta skyrtu á mannamóti. Hún getur ekki sýnt sig svona meðal fólks. Það væri bara pínlegt.

Hefur þú það sem þarf til þess að sigra?

2009-04-02T00:18:00.011+01:00

Beauty Camp Weekend er skemmtilegur sjónvarpsþáttur sem er að fara í loftið á Íslandi í samvinnu við DynamoModels, Borgartúni 16. Auglýst var í Fréttablaðinu í dag eftir 15 kröftugum einstaklingum til að taka þátt í krefjandi keppni um að umbreyta útlitinu. Takmarkið virðist vera að líta út eins og sköllóttur fimmtugur kall í rósaskyrtu. Meðal keppnisgreina má finna Enema Puta, Detox Extreme, Toothpicking Basics, Colonoscopy, Libido Acupressure, Manicure Testiquele og Nail Removal Renisance. Án efa verður erfitt að velja milli áhugasamra einstaklinga sem vilja standa sig vel í þessum greinum fyrir framan alþjóð.
Besta aprílgabb ever :-D
Pés: músiggtibbs dagsins: Martha Wainwright - Ball and Chain

Trúverðugleiki

2008-06-27T17:30:00.001+01:00

Það er eitthvað bipolar við þetta samfélag. Ef þú ert ekki með þá ertu á móti. Þegar vindáttin breytist ertu á móti en ekki með. Hún breytist reglulega. Víkingar sem sóttu gull í greipar eru ábyrgðarlausir spákaupmenn áður en varir. Almenn skynsemi og hagsmunir heildarinnar víkja reglulega fyrir bestuvinaklappáherðarnar sem viðgangast fyrir galopnum tjöldum. Þegar fíflið er í hinu liðinu er um að gera að spara ekki skotin heldur draga til saka fyrir alla muni þó að litlu skili. Þeir sem eiga upp á pallborðið krýna sig sem kónga. BiggiMaus dirfist að segja eitthvað kryptískt um Bubba. Bubba sjálfan. Hvernig dirfist hann? Enda gerir hann sig lítinn þegar sá stóri gerir sig stærri og grípur til vopna og verja. Enginn skal setja sig upp á móti mónarkíinu. Kóngurinn fær líka fullt hús stiga og dynjandi klapp á bakið frá skjálfandi lófum gagnrýnenda sem bara lofa. Er nýja platan mesta þrekvirki íslenskrar og hugsanlega útlendrar tónlistarsögu? Ég hef bara rennt henni einu sinni í gegn og platan er allgóð, en herregud! Væri hægt að sjá málefnalega gagnrýni einu sinni án eftirmála? Hér fá allir góða krítík frá gagnrýnendum sem ýmist eru fullir þrælsótta eða aumingjagóðir. Er til of mikils mælst að óska eftir smá perspektívi á þessu landi?

Making love with his ego

2007-04-03T20:27:00.000+01:00

Hver skyldu vera merkilegustu coverlög mannkynssögunnar fór ég að spá í á færibandinu til vinnunnar í dag. Þau eru nokkur góð, Nick Cave och Johnny Cash hafa gert slatta og svo hafa hinir og þessir tekið sig til og túlkað annarra smelli á nýstárlegan hátt. Við nánari hugsun varð mér ljóst að Bítlalög hafa oft verið tekin vel og tek ég saman i kippu fimm af þeim bestu hér:
Getting better - The Wedding Present
With a little help from my friends – Joe Cocker
Happiness is a warm gun – The Breeders
In my life – Johnny Cash
Helter skelter – U2
Og hér eru nokkur svakafín cover að auki fyrir coveráhugamanninn sem á allt:
I’m so lonesome I could cry - Cowboy Junkies (Hank Williams)
Voulez vous - Ham (ABBA)
Cactus - David Bowie (Pixies)
Ziggy Stardust – Bauhaus (David Bowie)
Hallelujah – Jeff Buckley (Leonard Cohen)
California Uber Alles – Disposable Heroes of Hiphoprisy (Dead Kennedys)
Motorcycle Mama – The Sugarcubes (Sailcat)
Vantar eitthvað á listann? Ósammála valinu? Birtu álit!

Músikmanía

2007-02-24T16:55:00.000Z

Ég er orðinn hundþreyttur á þessu Svíþjóðarlíferni og langar mest af öllu að labba frá öllu í slómó með allt í bál og brandi bakvið mig og einstaka bíl sem þeytist 20 metra upp í loft. Það er sennilega vegna þessa innilega leiða sem ég hef farið hamförum við að eignast nýja tónlist. Í gær labbaði ég inn í notaðraplötubúð og út með ekki minna en fjórar plötur sem fengust reyndar á einstökum kjörum, tíkall sænskar. Leyndist þar djásnið Maverick A Strike með Finley Quaye. Held að ég sé að fá inn nýjar víddir í minn tónlistarsmekk. Hef hlustað töluvert á John Legend sem er sálar r&b flytjandi, en Quaye er sálar reggí flytjandi. Hreint ekki vitlaus. Ef einhver vill andmæla því vil ég bara benda á lagið Sunday Shining. Að auki fékk ég þar Köld eru kvennaráð með Kolrössu krókríðandi nánast alveg óspilaða merkilegt nokk. Nú er ég svo kominn úr bæjarleiðangri með 10 plötur í farangrinum. Sex fékk ég að láni á bókasafninu: Dummy með Portishead (búinn að týna gamla eintakinu), Lesser Matters með The Radio Dept. sem á að vera svakafínt sænskt indí, Synchronicity með The Police sem ég á að vísu á vínyl, nýju plötuna með Moneybrother sem er á sænsku og heitir því Pengabrorsan, Dying to say this to you með The Sounds sem er hæpað sænskt band og svo eina plötu með Peter Bjorn and John, samt ekki sú með Young Folks. Ekki ónýtt? En minn var ekki saddur því að núna eru útsölurnar í gangi og þar fékk hann ekki minni stórvirki á slikk en Rio með Duran Duran, Vision Thing með The Sisters of Mercy og The Best of A Flock of Seagulls (frekar eitís í skapinu) og Begin to Hope með Regina Spektor. Veit varla hvar ég á að byrja næst því að fyrsta valið var gefið. A Flock of Seagulls er últimata eitíssveitin, Casíó syntar galore. Lag dagsins er því Wishing (I had a Picture of You). Lag allra tíma.

Komdu aftur Zlatan

2006-09-27T20:34:00.000+01:00

Agalegt fyrir íslenska landsliðið að snillingurinn Zlatan sjái sér ekki fært af eiginhagsmunaástæðum og almennum leiðindum að leika með sænska landsliðinu gegn Íslandi í haust. Maðurinn er með eindæmum latur og uppfullur af sjálfum sér og engri vörn til ama. Komst rétt áðan einn í gegn með bara löggilt þýskt gamalmenni á milli stórutáar og netsins. Raunhæfir möguleikar á marki? Nánast öngvir því að þetta var Zlatan. Fyrir nánast alla aðra og áttræða ömmu mína? 75-95%. Mark? Ekki að ræða það.

Fákur

2006-08-14T20:02:00.001+01:00

Jamm og já. Viðbrögðin við síðastliðnum innsendingum sýna að gestum hefur fækkað frá einumoghálfum til núll. Varla mælanlegt. Minns keypti reiðfák á laugardag og hugsaði sér gott til glóðarinnar enda með eindæmum traust dæmi. Þá tóku sænskir guðir í taumana sem þeir gera oft og dembdu niður monsúnrigningu í fyrsta skipti í sjöhundruðogþrettán ár (fjórtándagaþrjátímaogfimmsekúndur). Bíð eftir að fararskjótinn þorni svo að buxnarassinn haldist þurr að mestu. Þangað til tippsa ég um lag sem hlustandi á: Fujiya & Miyagi - Ankle injuries. Hei finndu sjálf(ur).

Músiggblogg

2006-08-09T22:04:00.000+01:00

Ég tók ákvörðun hér um sistens að bjóða upp á músigg með hverri færslu. Hvað er betur til þess fallið að lokka lesendur en þeir fagrir tónar sem umlykja undirritaðan á hverri stundu? Hins vegar er minns svo ótæknilega innréttaður að vita ei hvurnig á að fá hljóðdæmin á síðuna. Bíð ráða frá vitrari mönnum en þangað til verður lesandinn að fá tipps gömul og ný en öll góð án dæmis:
Sufjan Stevens - Jacksonville af Illinoise
Sufjan Stevens - Vito's ordination song af Michican. Ég gæti grátið.
Pixies - I've been waiting for you af B-sides
David Bowie - I've been waiting for you af Heathen. Cactus er kannski ennþá betra Pixies cover. Besta Bowie platan í 25 ár.
The Band - The long black veil af Music from big pink
Nick Cave - The long black veil af Kicking against the pricks. Flott cover af coverplötunni.
The Decemberists -The Infanta. Gott gobbídígobb í trommunum sem hestafólk myndu kalla brokk.

Heimalingur

2006-07-31T22:56:00.000+01:00

Genginn aftur eftir mánaðardvöl á landinu kalda. Rok, kuldi og rigning eins og vera ber. Það er gott að vera á Íslandi. Einhvernveginn finns mér eins og að sumarið eigi ennþá inni tvö golfkvöld og eina misheppnaða veiði, en betlarar fá ekki að velja. Ég ylja mér þó við minningarnar sem ég bar með mér ásamt fullt af drasli sem ég hafði geymt í bílskúrnum hjá pabba. Þar á meðal leyndust ýmis textabrot sem ég hafði skrifað í fyrra lífi. Sumt rusl nema hvað, en annað dálítið sniðugt. Þar á meðal díalóg sem ég á örugglega eftir að geta notað einhvers staðar og þessi kviðlingur sem ég samdi að sögn í fjórða bekk. Hvað segist? Efni í stórskáld?? Nýr Mattías kominn fram á sviðið???

Geysist að mér þarmaþemba
þú ert eina ástin mín
Þú skalt þínar hærur kemba
þrjóska litla fyllisvín.

Góðborgari

2006-06-18T15:19:00.000+01:00

Hér sjáið þið mann sem einn síns liðs keppist við að bæta Svíþjóð. Það er ekki lengra síðan en í dag að ég kom að grátandi stúlkugreyi sem hafði týnt mömmu sinni og hafði bara bansgsa að halla sér upp að. Svo raunagóður sem ég er fylgdi ég henni á rétta brautarstöð svo að hún gæti tekið lestina heim. Ekki er heldur langt síðan að ég stökk til og opnaði með handafli strætódyr sem höfðu lokast á kvensnift eina og ætluðu að kremja til örorku. Ekkert kemur gratís í þessum heimi og ég reikna með að verða sæmdur orðu af einhverju tæi fyrir manngæskuna. Sennilega er hún bara í póstinum.

Grýla er dauð

2006-06-12T09:14:00.000+01:00

Betri heimsókn er ekki hægt að hugsa sér. Fyrir leikinn sást glitta í möguleikann að kreista fram sigur. Landsliðið er enda gott um þessar mundir og Svíarnir eru ekki búnir að finna sig eftir að Faxi og félagar komust á eftirlaun. Fyrstu mínúturnar boðuðu þó ekki gott; Genzel lokaði markinu, læsti á eftir sér og sporðrenndi lyklinum. Einhver hafði þó tekið með sér dínamít og svo var boðið upp á besta leik sem íslenska landsliðið hefur leikið nokkru sinni. Nánast engin mistök allan leikinn, engin hræðsla, ekkert fall eftir hetjulega baráttu í 45 mínútur. Óli Stefáns var ekki í stuði en allir aðrir voru á ginsenghrossasterablöndu og voru óstöðvandi. Aldrei hefur svona sigurvilji sést í íslensku landsliði og ef einhver hefði haft vit á að gefa Óla dollu af Red Bull væri maður ennþá á svifi eins og helíumblaðra yfir Globen. Núna er Grýla dauð og þá er bara að urða hræið á Íslandi.

Heimsókn

2006-05-29T16:19:00.000+01:00

Bambigutti gerði stutt stopp og lét sér nægja að svelgja einum bjór og svörtum kaffibolla á versta sóðapöbb sem Stokkhólmur hefur uppá að bjóða og sporðrenndi síðan hálfum borgara á Burger King hinum megin við götuna en lét frönskurnar eiga sig. Eftir að hafa drukkið upp vodkabyrgðir Moskvuborgar dagana á undan var guttinn ekki reiðubúinn að gera annað en að leggjast marflatur útaf á flugstöðinni þennan prýðisfína sunnudag í maí. Því var honum snarlega skóflað upp í næstu áætlunarbifreið og sendur af stað aðra leið.

Sitthvað

2006-01-18T22:14:00.000Z

Langt síðan síðast, nýtt ár og svoleiðis. Þarf að ákveða skóla fyrir Sögu. Ó hvað tíminn líður! Það er eins og í fyrradag að hún birtist mér fyrst, þakin í slími. Ég hallast á að best sé að hún fari í skóla nálægt vinnunni minni og eru margar ástæður fyrir því. Allar praktískar. Ekki síst vegur þungt að Maria er að hugsa um að flytjast yfir í annan borgarhluta. Svona vangaveltur valda því að mér finnst ég vera fullorðinn. Eins gott að koma þessu út af borðinu sem fyrst og pæla ennáný í einskisverðum hlutum engum til gagns. Hef verið að spá mikið í Elliott Smith en félagi siggimus var svo elskulegur að veita mér höfundarverk þess látna heiðursmanns að gjöf. Mættu aðrir vera svo rausnarlegir. Ég hef mest hlustað á Roman Candle (1994)og EitherOr (1997) sem eru afskaplega góðar; melódískar og lágstemmdar. XO (1998) er hins vegar ekki jafn einlæg. Hann er of mikið að þreyta inngöngupróf í Dandy Warhols eða Boo Radleys. Virkar ekki alveg. Ég hef ekki hlustað nógu mikið á restina til að hafa myndað mér skoðun ennþá. Kannski að það verði efni í annan pistil.

Músíkþerapía

2005-12-04T10:24:00.000Z

Sumarið var heitt og haustið milt og vaggaði mér inn í öryggiskennd þegar myrkur lófi vetursins löðrungaði mig úr iðrum helvítis. Allt í einu var erfitt að koma sér á fætur á morgnana og halda sér gangandi á daginn. Ég hlóð mp3 spilarann upp af aggressívu pönki og þungu rokki í von um að það nægði til að hlaða mig upp. The Stooges, Rammstein og Dead Kennedys gerðu sitt til að garga mig í gang en ekki hjálpaði það samt. Það var fyrst þegar ég setti The Polyphonic Spree í eyrun að það birti til í minni sál. Þessi brjálaða breiðfylking frá Miami er eitthvað annað. Eitt leiddi af öðru og jákvæð hvetjandi tónlist fyllir út allt tómarúm. B52’s eru fyrirtaks gleðigjafar og næst á dagskrá er Saint Etienne. OMD fær að spreyta sig bráðum. Ágætu félagar! Dansið inn í veturinn með Roam, Dry County og Topaz. Byggið upp sálina með Two Thousand Places og Soldier Girl. Celebrate Youth með Rick Springfield er voða hvetjandi en ekki sérstaklega sterkt tónlistarlega og er mælt með af hálfum huga.
Hér er svo sniðugt lag og ódýrt vídeó. Njótið.

Oslo

2005-11-27T13:53:00.000Z

Eg hafdi møguleika a ad dvelja fram a sunnudag tho ad radstefnan vaeri buin thegar a laugardegi og var ekki seinn ad takka pent. Thad sem eg hins vegar var ekki buinn ad velta fyrir mer er ad sunnudagur i november synir kannski ekki bestu hlidar borgarinnar. Tho hefur verid gaman ad velta fyrir ser ymsum kuriositetum. Til daemis sagdi mer gutti sem afgreiddi kaffid ad astaedan fyrir thvi ad a gøtuvitum fyrir gangandi eru tveir raudir kallar ad Nordmenn seu setji yfirdrifid mikla aherslu a øryggi og fyrirbyggjandi radstafanir. Their seu mun verri en Sviarnir med thad og tha er thad yfirdrifid get eg abyrgst. Her eru lika fair hradbankar en ef madur finnur minibank tha stimplar madur inn upphaedina adur en madur slaer inn øryggisnumerid. Svo eru their mun meira liberal en Sviar med erotik og annan subbuskap. A adalgøngugøtunni sem er mjøg kosi tho ad allt se lokad snemma sunnudags er (lokud) budarhola sem selur ymsan kitlandi varning og allt er til synis, utglenntir kvenmannskloppar og plastredir i fullkominni augnhaed fyrir børn undir fermingu. Meira svona.

Heimskautaland

2005-11-19T13:08:00.000Z

Jæja þá, ég læt boð út berast um endurkomu til old blighty norðurskautsins eftir árs fjarveru. Halla mér aftur og bíð tárvotra svara og ekkasoga. Ekki múkk fæ ég frá ágætum vinum til fjölda ára, en mörg heimboð og heillaskeyti frá öllum fyrrum vinnufélögum. Það er ljóst hverjum maður getur hallað sér upp að þegar í harðbakkann slær. Það eru þó fleiri en siggimus sem er gestur kvikmyndahátíða. Ég er með árskort og magn miða á Stockholms filmfestival sem ég á ekki eftir að getað komið í lóg. Nýkominn af viðtali við Terry Gilliam og er að fara að hoppa upp í strætó til að sjá heimildarmyndina um Flaming Lips: The Fearless Freaks. Og á morgun fer minn á heitt stefnumót svo að helgin er með besta móti. Hafiði það.

Dylan uppgötvaður

2005-11-05T11:43:00.000Z

Loksins taldi ég í mig kjark og lagði í þann stóra. Blonde on Blonde blasti við þegar ég var að svipast um eftir Sigur rós og þar sem ég hafði einmitt kvöldið áður horft á heimildarmynd um Dylan varð mér ljóst að undan væri ekki komist að þessu sinni. Hann hefur hingað til ekki verið spilaður á mínu heimili þar sem að hans höfundarverk er svo víðfeðmt að erfitt er að ná utanum. Ef maður fellur fyrir Dylan þá lendir maður á bólakafi svo að ég hef leitt hann hjá mér hingað til. En nú er ekki aftur snúið. Hvílík plata! Nú er sko sungið og trallað svo um munar. Hættan er að ég versli mér snarlega inn annað stórvirki, Highway 61 Revisited, og þá held ég að önnur áhugamál geti siglt sinn sjó næstkomandi mánuði.

The Famous F365 Mailbox

2005-10-24T18:09:00.000+01:00

Football365.com er fótboltasíða sem ég heimsæki reglulega til að fræðast um enska boltann. Þetta er sniðug síða og meðal annars er þar hægt að lesa lesendabréf. Um daginn vældi Arsenal aðdáandi yfir því sem hann hélt fram að væri niðurrifsstarfsemi gagnvart Arsenal á síðunni sem lýsti sér í neikvæðum fréttum um félagið. Það hvatti mig til að senda inn bréf, sem var birt í dag með fallegri fyrirsögn. Mjög gaman því það er erfitt að komast að. Svona hljómar það:
Very Possibly The Best Mail We’ve Ever Published
I am absolutely disgusted with your anti-IA Akranes crusade. Your blatant lack of coverage on the proud Icelandic team is a travesty and obvious to everyone. You go out of your way to publish useless speculation on Henry but conveniently fail to report that IA Akranes, a team that has produced such outstanding players as the Thordarson brothers and the Gunnlaugsson twins (yes everyone is related. It’s a good thing.), recently lost their best back to rivals KR Reykjavik. If you think that your pathetic tactics to unsettle the team will be successful I will have you know that we, the fans of IA Akranes, are a tough breed. We have seen it all before. You will not break us.
Stefán, Stockholm

Nafnamálið

2005-08-16T20:01:00.000+01:00

Alltaf er eitthvað að detta inn um nafnamálið víðfræga. Mogginn, Expressen, fréttablað Norrænu ráherranefndarinnar og Gimli í Manitoba hafa fjallað um það og samstarfsráðherrar Norðurlandanna á Íslandi og Svíþjóð handsöluðu samþykki um að leysa hnútinn en samt höfum við enn á ný fengið höfnun frá sænska réttakerfinu. En sumsé þetta fannst í vikunni. Birtandi er GewitterOnline, Zeitung der Fakultätsvertretung Geisteswissenschaften í maí 2002:

Probleme mit isländischem Namen
Ein Ehepaar, das vor kurzem mit seiner kleinen Tochter von Island nach Schweden zurückgekehrt war, muss dort wegen des Namens des Mädchens mit bürokratischen Hürden kämpfen. Die Tochter von Stefán Vilbergsson und Maria Nygard wurde in Island auf den Namen Saga Nygard Stefánsdóttir getauft. Gemäß dem schwedischen Namensrecht kann das Mädchen seinen Namen nicht behalten, da Kinder in Schweden den Familiennamen eines Elternteils tragen müssen. Falls sich die Behörden zu einer Ausnahmeregelung durchringen können, warten weitere Probleme auf die Familie: Sollte Saga einen Bruder bekommen, muss dieser den gleichen Namen tragen wie seine Schwester, er hieße mit Familiennamen also „Stefánsdóttir“.

(Einskonar) heimkoma

2005-07-27T17:18:00.000+01:00

Kominn aftur búinn á sál og líkama eftir að hafa reynt að þurrausa Eystrasaltið ásamt Siggamus. Það er lítið eftir allavega. Riga var flott, fínasta veður oftast og velformað kvenfólk sem kepptist við ásamt Aldaris að gera ferðalöngum lífið gott. Reynt var að hafa lítið fyrir stafni nema að skipta um hótel hverja nótt. Svo kvöddum við með heimsókn á svakalegasta næturklúbb í vestrænum heimi sem við viljum halda fyrir okkur sjálfa og næstu heimsókn takk fyrir mig. Fimm tíma rútuferð til Tallinn daginn eftir var ekki það sem læknirinn hafði skrifað upp á og kjassandi unglingar með Douglas Adams í næsta stól riðu mér næstum að fullu. Enda tók tímann sinn að komast upp í annan gír í Tallinn. Þegar Valli baar var svo fundinn var ljóst að Riga hafði fengið alvarlega samkeppni. Tvö kvöld með eistnesku kvenfólki, hollenskum eiginmönnum, brjáluðum einförum og Millimallikas. Verður það betra? Ef versti tremminn fer á braut gæti svo farið að búllan verði heimsótt á ný. Ertu til Siggimus?

Júlí tvö

2005-07-13T20:47:00.000+01:00

Billegt rauðvín í hægri greip og reiðubúinn að rita langþráð framhald júlísögunnar góðu: Finnland OG Lettland spyr fólk forviða. Hvaða brjálæði hefur gripið drenginn? Er hann loksins orðinn ær? Því er nú öðru farið kæri lesandi. Til þess að geta hitt á heimshornaflakkarann siggamus greip ég tangarhald á ferðaskrifstofu á netinu og pantaði miða til Riga. En þar sem að makkarnir eru þekktir fyrir svall við endurfundi neyðist ég til að láta frá mér dóttur kærri í hendur móðurforeldra sem nú eru staddir í austurbotninum finnska. Öll bein sæti voru horfin undir aðra botna svo að við feðginin leggjum í mestu svaðilför á föstudag. Fyrst vöknum við klukkan fjögur um morguninn sem flytur hugann til ættjarðarinnar. Flogið er klukkan sjö til Tampere og þaðan er lestin tekin til Vaasa og varningnum dýrmæta skilað af mér. Næsta lest tilbaka og svo er flogið til Riga frá Tampere, þökk sé Ryanair, seint um kvöld. Örþreyttur lendi ég svo hálftuttuguogþrjú og stefni beina leið á siggamus sem bíður í ofvæni með kalda kollu og handfylli af hansastoðum.

Júlí

2005-07-12T22:23:00.000+01:00

Júlí er að verða hálfnaður og sumarfríið líka. Maria er í Danmörku svo að Saga hefur verið hjá mér fyrir utan nokkra daga sem hún var hjá móðurforeldrunum vegna tíðra heimsókna hjá undirrituðum. Það hefur gengið mjög vel og ég hef notið þess að vera með henni. Ég óttaðist svolítið að það yrði erfitt fyrir okkur bæði að vera svona mikið saman en það gengur ótrúlega vel. Mervi og Sakari kærasti hennar dvöldust á gólfinu í stofunni í tvær nætur. Hingað til hafa gestir fengið að liggja í appelsínugula hlussusófanum en ég ákvað í stundarbrjálæði að fjárfesta í dýnu sem blásin er upp af mótor. Allir segja að þetta sé undradýna enda amerísk. Bandaríkjamenn kunna að dekra við sjálfa sig það verður ekki af þeim tekið. Við fórum þrjú á Accelerator, rokkhátíð sem haldin er árlega og er þekkt fyrir að stóla á nýjar efnilegar hljómsveitir sem hafa nýlega gefið út fyrstu plötuna. Til þess að fá fleiri til að kaupa miða er svo boðið inn þekktari nöfnum að auki. Ég sá Stars, Bloc Party, Smog, Colleen, Teenage Fanclub, Jenny Wilson og Sonic Youth meira eða minna. Flott hátíð. Svo kom Mæja systir og gaf mér sólarhring til að sýna henni stórborgina. Ég held að það hafi gengið bærilega. Mér tókst að fara bæði með hana og Mervi á smá siglingu um skerjagarðinn. Þeir sem vilja heimsækja mig í sumar geta fengið sömu meðhöndlun. Óskar er mögulega hættur við að koma við enda víðförull drengurinn og ekki skrítið að hann þreytist á flakkinu. Ég er enda búinn að festa mér miða til Finnlands og Lettlands á föstudag. Hvers vegna? Það er efni næstu færslu.

Eplið og eikin

2005-07-04T20:07:00.000+01:00

Ég hafði hent Sögu út með golfkylfu og kúlu í blíðviðrinu. Korteri seinna heyri ég hana æpa upp og hleyp út í dyr. Geri ráð fyrir að hún hefði klemmt sig á útidyrahurðinni sem er með pumpu, en sem hún á að ráða við. Þegar ég kem fram starir hún á hurðina og svo lemur hún snöggt í rúðuna með kylfunni. Rúðan brotnar eins og vera ber. Þegar við vorum búin að jafna okkur, búin að skamma og taka á móti skömmum, fæ ég skýringuna á ofbeldinu. Þegar hún ætlaði að fara inn eftir velheppnaða æfingu sat geitungur á hurðinni. Hún ætlaði að berja hann niður til að komast áfram. Gaman að sjá að hún er hvatvís eins og ættin.

Gestkvæmt

2005-06-30T18:58:00.000+01:00

Í stað heimshornahoppa tek ég á móti gestum í Casa Kurteiz í sumarleyfinu . Dísætir kokteilar verða sötraðir við undirleik frameftir júlímánuði og gestgjafinn bendir á merkilegustu mubblurnar með pípusterti. Mæja systir tekur sæti Mervi í sófanum sem mest verður notaður sem fleti og hver veit nema Óskari detti í hug að prófa gripinn eftir að hingað til hafa staðið gólfið til boða. Saga verður í föðurhúsum þar sem móðirin verður við nám í Danmörku, en þegar svo Siggimus nálgast Eystrasaltið verður hún látin ættingjum í té. Það er útlit fyrir annasaman tíma þó að föðurlandið fái að bíða um skeið.

Lapptopp

2005-06-10T21:54:00.000+01:00

Hafið gaman að gumar og gleðikonur. Nú er kjöltutoppur í hús kominn í stað ónýtrar hlussu sem engum er til gagns. Nú er það bara letin sem komið getur í veg fyrir stanslausar bloggfærslur. En núna nenni ég þessu ekki lengur.

Lóurnar kvaka

2005-05-24T15:20:00.000+01:00

Jonkurteiz hefur tekið eftir því að með vorinu hefur braskaraeðlið kraumað og hann er sést oft í skuggalegum afkimum falbjóðandi vöru og þjónustu ýmsa. Hann er þó síli í torfunni og varla skiptir nema sænskur þúsundkall um eigenda þegar hann stendur í mestu stórræðunum. Nú er heimasíða þýdd fyrir þurfandi aðila og svo bauðst brakandi þúsundkall fyrir flauturnar á drossíunni plús nýtilverkaðar flautur í þokkabót. Get ég gert þér smáviðvik?

Tæknin eitthvað að stríða

2005-05-19T16:24:00.000+01:00

Aftur getur maður berað sig heiminum eftir að smávægileg tæknivandamál hafa heft framrás. Það er ekki síst mikilvægt að teygja sig fram og reyna að snerta aðra sál þegar aðrir eru horfnir á braut. Ó veitið mér hlýju! Farinn er konufaðmur og einn bylti ég mér á nóttunni í rúmi í einnioghálfri breidd. Og ástkær dóttir er horfin til Finnlands að kveðja langömmu hinsta sinni. Ekki fyrir það að ég loki mig af í minni einsemd en flíka henni frekar í margmenni. Í gærkveldi var litið á tónleika tvo íslenska. Fyrst var barið upp á hjá Kristni Sigmunds sem fór digurbarkalega með nokkrar vísur og svo leit ég inn hjá Hjálmum sem sýndu að það er hægt að spila reggí í gerfi Gísla á Uppsölum. Gott hjá þeim. Þá á Morrisey ammæli á sunnudag og verður blásið á kerti í veislusal honum til heiðurs.

Einbjörn

2005-04-22T21:29:00.000+01:00

Það fór ekki þannig að mér héldist á henni frekar en öðrum af hennar tæi. Fyrirrennarar eru runnir á braut og nú er hún það einnig. jonkurteiz bætist enn í hóp góðra vina og yfirlýsir stuðningi á félaga bambagutta sem einsamall hefur frú. One is such a lonely number segir Madonna en það þarf ekki að vera svo. Það má alltaf kaupa burkna.

Grundirnar gróa

2005-04-06T11:57:00.000+01:00

Sá tími kemur í ári hvers manns að hann verður að huga að sumarleyfi. Sá tími er nú. Þetta er allt hin erfiðasta ákvörðun að þessu sinni. Félagi siggimus beinir sjónum að Eystrasalti en á sama tíma verður að taka með í reikninginn að dóttir Saga verður fastur félagsskapur í júlí þar sem hennar móðir er búin að skrá sig í dönskubúðir lungann af júlímánuði. Ísland stóð ekki á farseðlinum lengst af en líkur eru til að leið liggi til eyjarinnar freðnu þrátt fyrir allt. Félagi bambi beitir veiðiferð á öngul og það er safaríkt agn. Er hægt að koma þessu öllu saman svo að alls sé notið og engu leyft?

Taxi

2005-03-29T15:58:00.000+01:00

Leigubílsstjórar í Riga eru meindýr sem kurteiz vildi ekki bjóða bólfestu á nokkrum manni. Öll brögð eru leyfileg við svik og pretti sem bitnar á bláeygðum gestum. Fyrst lendir undirritaður og frú undirritaður í klónum á skrattakolli sem hefur enga tungu aðra en sína klofnu rússnesku. Hann hefur með brögðum náð sér í verðmæli sem mælir verð ríflegar en ella þegar farþegar gjóa augum á mannvirki handan við bílrúðu. Keyrir svo burt í hendingskasti með illa fenginn aur og hefur ekki fyrir því að loka afturlúgu. Svo er það hinn þrjóturinn sem kann bara að rífa kjaft og heimtar alls konar aukapening sem ekki var um samið fyrirfram og hótar með löggu þegar maldað er í mó. Að skilnaði gefur sá grái tilbaka litháska mynt í skjóli myrkurs. Varist þann drýsil börnin góð.

Rigapáskar

2005-03-24T10:27:00.000Z

Þegar maður er kusk í nafla alheimsins er stutt upp á belg þó að langt sé út á nára. Því gref ég mig upp úr þeirri holu sem er Stokkhólmur og held til Riga með spúsu. Stafræn gögn af ýmsu tæi eru þar seld fyrir slikk og hafa sjarmerandi togkraft á undirritaðan þar eð stjórnvöld sænsk veifa ávítandi fingri að þeim sem dirfast hlaða heiminum inn í stofu. Jón Kurteiz veifar því á móti og kastar kossum af þilfari til þeirra sem vilja honum og hans vel.

Þreyta

2005-03-21T13:46:00.000Z

Nú er ég hættur að sofa. Þetta var ekki meðvituð ákvörðun heldur hefur líkaminn gert uppreisn með því að hækka stressþröskulda svo að augun haldast opin á óguðlegum tímum. Nú reyni ég að berjast á móti með því að dæla í hann kaffi í lítravís svo að upp úr flæðir. Það er allt í járnum og ekki má á milli sjá hver fer með sigurlaunin.

Fyrsta blogg

2005-03-18T23:30:00.000Z

Hana. Þá er maður kominn fyrir almennings augu. Næsta skref er 24 tíma netmyndavél frá baðherberginu og þátttaka í Temptation Island.